Dhuusamareeb (Idaacadda Daar-Dheer)-Kooxda kubadda cagta Liverpool ayaa hal dhibic u jirsatay kooxaha kaalmaha saddexaad ee iyo afraad ee Manchester United iyo Newcastle United kaddib markii ay 3-0 kusoo garaacday kooxda heerka laab qarka u saaran ee Leicester City iyadoo dhamaadka xilli ciyaareedkana ay laba kulan oo kali ahi uga hadhsan yihiin, waxaanay ahayd guushoodii toddobaad ee xidhiidh ah ee ay kasoo hooyeen horyaalka Premier League.
Liverpool ayaa si weyn sare ugu soo qaadday fursadda ay kaga faa’iidaysan karto haddii ay kufaan kooxaha ka horreeya, waxana caawiyey saddex dhibcood oo ay kasoo xoogeen Leicester City.
Laba gool oo qurux badan oo saddex daqiiqadood gudahood uu ku dhaliyey Curtis Jones ayaa Liverpool qaybtii horeba ay hoggaanka ku qabatay, halka qaybta labaadna uu gool saddexaad oo laad xor ahaa ku suuxiyey Leicester City xiddiga reer England ee Alexander-Arnold.
Jurgen Klopp oo ciyaarta ka hor uu walaac ku abuuray dhaawaca Darwin Nunez, ayaa waxay ciyaartoyda kooxdiisu muujiyeen dedaal badan oo bilowgiiba ah, waxaana fursado sameeyey Luis Diaz iyo Cody Gakpo.
Curtis Jones ayaa kubbad uu Mohamed Salah kasoo qaaday garabka midig kula kulmay xerada ganaaxa, waxaana uu ku qabtay lugta bidix isaga oo ku hubsaday shabaqa uu waardiyeynayey goolhaye Daniel Iversen oo kusoo baxay, waxanay kubaddu goolka ka gashay birta dhinaca midig agteeda.
Leicester City oo ka naxday goolka laga dhaliyey, ayaa waxay aragtay iyadoo haddana kubaddu dhax taalla shabaqooda saddex daqiiqadood kaddib. Jones ayaa mar kale helay kubbad uu soo dhiibay Mohamed Salah oo uu darbad xooggan dhinaca ka dhigay goolhaye Daniel Iversen.
VAR ayaa laga soo hubiyey goolkan iyadoo laga shakisanaa inuu Jones kusii jiray offside, hase yeeshee waxa loo xaqiijiyey in uu la sinnaa difaaca oo aanu ka horreyn, sidaas ayaanay qaybta hore ugu soo dhamaatay 2-0.
Markii lagu soo noqday qaybta labaad ayuu goolhaye Alisson Becker badbaadiyey kubbad halis ahayd oo uu ku toogtay Youri Tielemans oo uu gacanta bidix la tiigsaday una saaray koorne.
Mar kale ayaa waxa kubbad kula soo baxay James Maddison, waxaase kasoo gaadhay oo madax iskaga saaray goolhaye Alisson oo la shaqaynayay difAacyahannada.
Alexander-Arnold ayaa hoggaanka usii dheereeyey Liverpool dhamaadka ciyaarta oo ay 20 daqiiqadood ka hadhsan tahay, kaddib markii laad xor ah oo uu Mohamed Salah usoo taabtay uu ku toogtay goolka oo uu shabaqa ku hubsaday.
Mohamed Salah oo saddex caawimood sameeyey ayaa uu nasiibku diiday markii uu kubbad kula baxay goolka, waxaana iyadoo aanay cidina cidhiidhi ku haynin uu garab mariyey birta.