Dhuusamareeb (Radio Daar-Dheer)-Sida lagu sheegay warbixin cusub, weeraryahanka Paris Saint-Germain ee Kylian Mbappe ayaa Arsenal ku biiri lahaa haddii uu horyaalka Premier League u wareegayo.
Mustaqbalka Kylian ayaa ah mid markale mugdi galay, Real Madrid ayaa ah kooxda mudada ugu dheer xiisaynaysay xilli ay Paris meel cad iska taagtay xaaladiisa.
Mbappe ayaa u sheegay PSG inuu kooxda ka tagayo marka uu dhammaysto sanadka uga hadhsan heshiiskiisa taas oo ka dhigan inay Paris xiddiga ugu qiimaha badan kubadda cagta xor ku waayi karto.
Lama filayo inuu horyaalka Premier League u wareego balse haddiiba ay dhici lahayd ayaa la sheegay in 24 sano jirkaasi la dhacsan yahay taageerana u yahay tababaraha Arsenal ee Mikel Arteta.
Sida lagu xusay wargeyska The Independent, Arsenal iyo PSG ayaan wax xidhiidh ah samayn iyadoo ciyaaryahanka loo arko mid ka baxsan xayndaabka dhaqaale ee Gunners.
Arteta ayaa xilli ciyaareedkii hore booska labaad geeyay Arsenal isagoo culays saaray kooxda xoogan ee Manchester City.
Mbappe ayay warbixintu sheegaysaa inuu taageere u yahay sida uu Arteta u horumarinayo kooxdiisa isagoo sidoo kale ay ka gadantay aragtida ah inuu kooxda ka caawiyo hanashada horyaalka.
Real Madrid ayaa iyadu doonaysa inay xagaaga dambe Kylian si xor ah ku hesho halka PSG imika suuqa dhigtay haddii uusan heshiis kordhin samaynayn.