Dhuusamareeb (Idaacadda Daar-Dheer)-Waxa jirta Hal abaalmarin oo shaqsi ah oo uuna Lionel Messi wali ku guulaysan xirfadiisa ciyaareed xilli uu sugayo in uu ku guulaysto abaalmarintii 8-aad ee Ballon d’Or-ka.
Xiddiga Inter Miami Messi ayaa ah xiddiga ugu cadcad in uu ku guulaysto abaalmarintiisii 8-aad ee Ballon d’Or ee Paris dhamaadka bishan kadib markii uu qaab ciyaareed cajiib ah soo qaatay.
36 jirkaan ayaa door muhiim ah ka ciyaaray sidii uu Argentina ugu guulaysan lahayd koobkii adduunka ee lagu qabtay Qatar.
Messi ayaa sidoo kale xilli ciyaareed cajiib ah ku qaatay kooxda PSG oo uu u dhaliyay goolal badan oo muhiim ah.
Intii uu ku guda jiray xirfadiisa quruxda badan, Messi waxa uu ku guulaystey abaalmarino shakhsi ah oo aan la soo koobi karin, waxaana uu jabiyay rikoodho badan.
Si kastaba ha ahaatee, waxaa jirta hal abaalmarin oo uu ilaa hadda ku guuldareystay inuu ku guuleysto, taasoo ah cagta dahabka ah.
Cagaha Dahabka ah ayaa soo jirtay muddo 20 sano ah, waxaana ku guuleystayaasha horay ugu jiray liiska halyeeyada kubada cagta, laakiin liiska waxaa ka maqan hal magac waana midka Messi.
Si aad ugu guulaysato abaalmarinta, waa in aad ka weyn tahay da’da 28 si aad ugu tartanto, waana abaal-marin hal mar kaliya lagu guulaysan karo.
Waxaa la siiyaa ciyaaryahankii ugu fiicnaa sanadka ay codeeyaan saxafiyiinta, waxaana horey ugu guuleystay Cristiano Ronaldo, Mohamed Salah, Luka Modric iyo Ronaldinho.
Sannadkii 2022, abaal-marinta waxa ku guulaystay weeraryahanka kooxda Barcelona ee Robert Lewandowski.