Dhuusamareeb (Idaacadda Daar-Dheer)-Lionel Messi iyo Cristiano Ronaldo ayaa isaga hor iman doona kulan marka ay kooxda Inter Miami la ciyaari doonto kooxda Al-Nassr kulan saaxiibtinimo oo ka dhici doona sucuudiga bisha February.
Halyeeyada kubada cagta ayaa wakhti badan isaga hor yimid horyaalka la Liga markii ay joogeen kooxaha Real Madrid iyo Barcelona waxana ay ku tartameen koobab badan oo shaqsi iyo koox ah.
Messi ayaa ka tagay PSG waxana uu ku biiray kooxda Inter Miami halka uu Ronaldo oo ku biiray horyaalka sucuudiga suuqii January.
Ciyaartan saaxiibtinimo ayaa lagu wadaa in ay ka dhacdo garoonka King Fahad, oo qeyb ka ah xilli ciyaareedka Riyaad ee dalka Sacuudiga oo ay horay ugu jireen bandhigyadii feerka ee ugu weynaa taariikhda.
Inter Miami vs Al-Nassr waxay dhici doontaa isla bisha uu dhacayo dagaalka taariikhiga ah ee miisaanka culus ee u dhexeeya Tyson Fury iyo Oleksandr Usyk kaas oo la xaqiijiyay todobaadkii hore.
Hadal uu soo saaray Turki Alalshikh oo ah Guddoomiyaha Hay’adda Madadaalada Guud ee Sacuudiga ayaa lagu yiri: “Waxaan rajeyneynaa inaan qof walba oo ka socda Inter Miami ku soo dhaweyno bisha February, koobka xilli ciyaareedka Riyaad, kaasoo kulmi doona dhowr xiddig oo caalami ah oo ka kala socda saddexda kooxood. tartamaya”.