Dhuusamareeb(Radio Daar-Dheer)-Halyeeyga kubadda cagta ee reer Scotland Graeme Souness ayaa saadaaliyey Kooxda horyaalka Premier League xilli ciyaareedkan ku guuleysan doonta.
Halyeyga kooxda Liverpool ee Graeme Souness ayaa muujiyay fikirkiisa ah in Manchester City ay waddo furan u tahay inay markale ku guuleysato horyaalka Premier League.
Man City ayaa shalay garoonkeeda Etihad guul weyn kaga gaartay kooxda Southampton, kaddib markii ay kaga adkaatay 4-0, kulan qeyb ahaa horyaalka Premier League ee dalka England.
Wargeyska “Daily Mail” ee dalka England ayaa shaaca ka qaaday wareysi uu bixiyay halyeyga kooxda Liverpool ee Graeme Souness, waxaana hadaladiisa ka mid ahaa:
“Waxaan u maleynayaa in kooxaha Premier League ay u ciyaari doonaan booska labaad haddii Manchester City aysan la kulmin dhibaato dhaawacyo ah.”.
Si kastaba ha noqotee, kaddib guushii ay shalay Manchester City ka gaartay Southampton, ayaa ka dhigtay in Sky Blues ay hoggaanka u qabatay horyaalka Premier League, kahor kulanka ay Arsenal maqribka la balansan tahay Liverpool waxayna leedahay 23 dhibcood.