Dhuusamareeb (Idaacadda Daar-Dheer)Kooxda kubadda cagta Liverpool ayaa kusoo laabatay jidka guusha horyaalka Premier League, waxaanay 2-1 kaga adkaatay Tottenham oo ay ku booqatay magaalada London kaddib laba ciyaarood oo isku xigay oo kooxaha Nottingham Forest iyo Leeds United ay ka badiyeen.Laba gool oo qaybtii hore uu dhaliyey Mohamed Salah ayaa Liverpool siiyey saddex dhibcood oo ay aad ugu baahnaayeen oo ay dib ugu soo laabteen dariiqa guusha, isla markaana ay kusoo galeen kaalinta siddeedaad ee miiska kala-sarraynta horyaalka Premier League.Daqiiqaddii 70aad ayay Tottenham keentay goolkeeda ciyaarta, waxaana u dhaliyey Harry Kane oo kubbad uu dhinac midig kala soo galay darbad xooggan ku weydaariyey goolhaye Alisson oo awoodi waayey in uu leexiyo iyadoo kubaddu hortiisa maraysa.Dhawr fursadood oo kale oo dahabi ahaa ayay heshay Tottenham, waxaase u babac-dhigay oo geesiga ciyaarta noqday Alisson Becker, iyadoo kubbad uu fursad uu Nunez helay oo uu birta ka jarayna lagu qaaday offside.Guushan ay Liverpool gaadhay ayaa ka dhigan inay soo gashay kaalinta siddeedaad ee horyaalka Premier League, waxaanay leedahay 19 dhibcood, iyada oo 15 dhibcood ka dambaysa Arsenal oo hoggaanka horyaalka haysa.