Dhuusamareeb (Idaacadda Daar-Dheer)-Kooxda Barcelona ayaa dib ugu soolaabatay wadada guulaha tartanka Champions League ka kadib markii ay si xamaasad leh 6–1 ugu garaacday kooxda martida ahayd ee Olympiacos, ciyaar ka dhacday fiidnimadii Salaasada garoonka Montjuïc ee gobolka Catalonia, taasoo qayb ka ahayd wareegga saddexaad ee marxaladda kooxaha.
Kooxda Catalonia ayaa goolka hore dhalisay daqiiqaddii 7-aad ee ciyaarta iyadoo uu dhaliyay Fermín López, ka hor inta uusan mar kale shabaqa taabanin isagoo dhaliyay goolkii labaad daqiiqaddii 39-aad, waxaana qaybtii hore lagu soo afmeeray natiijadaas.
Kadib nasashada, kooxda martida ah ayaa awoodday inay yareyso farqiga goolasha kadib markii Ayoub El Kaabi oo u dhashay Morocco uu si guul leh u dhaliyay rikooro, balse saaxiibkiis Hezy ayaa laga saaray garoonka kadib laba kaadh oo digniin ah daqiiqaddii 57-aad.
Lamine Yamal ayaa dhaliyay goolka saddexaad ee Barcelona isagoo ka dhaliyay rikooro daqiiqaddii 68-aad, waxaana raacay Marcus Rashford oo dhaliyay goolkii afraad daqiiqaddii 74-aad. Ka dib, Fermín López ayaa dhammaystiray hat-trick-giisa shaqsiga ah isagoo dhaliyay goolkii shanaad ee kooxda daqiiqaddii 76-aad.
Rashford ayaa mar kale shabaqa taabtay isagoo dhaliyay goolkii lixaad ee Barcelona daqiiqaddii 79-aad, goolkaas oo uu ka caawiyay Pedri.
Natiijadaas awgeed, Barcelona waxay gaartay 6 dhibcood, taasoo si ku-meelgaar ah u siisay kaalinta saddexaad ee jadwalka kala saraynta.