Dhuusamareeb (Idaacadda Daar-Dheer)-Man United ayaa hal lug la gashay Final-ka tartanka Carabao cup-ka kadib markii ay garaaceen kooxda Nottingham Forest kulan ka tirsanaa lugta 1-aad ee Semi-final-ka Tartanka.
Red Devils ayaa si dar-dar leh ku bilaabatay ciyaarta waxana ay soo bandhigeen qaab ciyaareed aad u fiican iyaga oo ka awood badnaa kooxda Nottingham Forest.
Kooxda Man United ayaa daqiiqadii 6-aadba dhalisay goolka 1-aad ee ciyaarta waxana u dhaliyay xiddiga Marcus Rashford kaas oo hogaanka u dhiibay kooxdiisa ciyaartana ka dhigay 1/0.
Kooxda Nottingham Forsest ayaa isku dayday in ay ciyaarta ku soo laabato waxana ay qaadayeen weeraro rogaal celis ah oo ay ku raadinayeen bar-baraha.
Daqiiqadii 23-aad ayay Nottingham Forest dhalisay goolka bar-baraha waxana u dhaliyay xiddiga Sam Surridge kaas oo ciyaarta ka dhigay 1/1.
Laakiin goolkaas ayaa la diiday kadib markii VAR dib loogu noqday waxana lagu diiday offside uu ku jiray xiddigii soo dhigay fursadii goolka laga dhaliyay.
Man United ayaa sii waday raadinta goolal kale oo ay doonaysay in ay ku disho ciyaarta iyaga oo iska ilaalinayay lama filaan ay kala kulmaan Nottingham Forest.
Daqiiqadii 45-aa ayay Man United dhalisay goolka 2-aad ee ay ku dilayso ciyaarta waxana u dhaliyay xiddiga Wout Weghorst kaas oo dhaliyay goolkiisii ugu horeeyay ee kooxda.
Waxa sidaas ku dhamaatay qaybta hore ee ciyaarta oo ay Man United si fudud hogaanka ugu qabatay una qalantay in ay 2 gool dhaliso.
Qaybta dambe ee ciyaarta ayaa ahayd mid ay Man United kaliya maamulaysay laakiin si fiican u difaacanaysay goolkeeda isla markaas u diiday Nottingham Forest in ay dhaliso goolal ku soo celiya ciyaarta.
Tababare Erik Ten Hag ayaa sidoo kale is badalo ku sameeyay shaxdiisa isaga oo nasiyay xiddigaha ugu muhiimsan kooxdiisa.
Man United ayaa daqiiqadii 88-aad dhalisay goolka 3-aad ee ciyaarta waxana u dhaliyay xiddiga Bruno Fernandes kaas oo ciyaarta ka dhigay 3/0 ay Inited ku hogaaminayso ciyaarta.
Waxa sidaas ku dhamaatay ciyaarta oo ay Man United hal lug la gashay Final-ka koobka Carabao cup-ka ka hor kulanka lugta 2-aad ee tartanka ka dhici doonta Old Trafford.