Dhuusamareeb(Radio Daar-Dheer)– Manchester City ayaa guuldarro xanuun badan ay ku soo gaartay London ka dib markii ay guuldarro 1-0 kala kulmeen kooxda Tottenham oo niyadjabisay tababare Pep Guardiola.
Gool uu qeybtii hore dhaliyay Harry Kane ayay Tottenham ku dubatay City, iyadoo Cristian Romero uu casaan ka qaatay Spurs dhamaadkii ciyaarta halka tababare Pep Guardiola uu eeday go’aankii uu keyd ku geliyay Kevin de Bruyne.
Manchester City ayaa iska qasaarisay fursad dahabi aheyd oo ay ugu dhawaan kareen koxda hogaanka heysa ee Arsenal oo shalay laga badiyay, laakiin weli waxay shan dhibcood ka danbeeyaan Gunners oo kulan uu u sii harsan yahay.
Balse daqiiqadii 15aad Tottenham ayaa heshay fursadeedii ugu horeysay ciyaarta markii uu Rodri baas daciif ah u dhiibtay Hojberg kaasoo la galay gudaha xerada ganaaxa ka hor inta uusan u dhigin Harry Kane oo taabashadiisii ugu horeysay ciyaarta kubada dabmariyay goolhaye Ederson.
Kane ayaa goolkaan ku dhigay rikoodh cusub isagoo noqday xiddigii abid ugu goolasha badnaa taariikhda Tottenham isagoo maraya 267 gool, waxa uu sidoo kale noqday xiddigii seddexaad ee taariikhda Premier League ee 200 gool dhaliya ka dib Alan Shearer iyo Wayne Rooney.
Daqiiqadii 87aad Tottenham waxaa jaale labaad ka qaatay oo qasaan la siiyay Cristian Romero, iyagoo ciyaarta ku dhameystay 10 ciyaaryahan. Tababare ku xigeenka Tottneham ayaana durbadiiba bedelay Kuluveski isagoo soo geliyay Sanchez si uu u ciyaaro 5-3-1 oo ah inay difaacdaan goolka.
Waxay ciyaarta ku soo dhamaatay 1-0 oo ay Tottenham kaga badisay Manchester City.