Dhuusamareeb (Idaacadda Daar-Dheer)-Kooxda Arsenal oo 10 xiddig ah ayaa guul ka gaadhay kooxda Wolves oo iyaduna 10 xiddig ah kulan ka tirsanaa premier League.
Ciyaarta ayaa ahayd mid ay Arsenal maamulayso laakiin ay ku dhibaatoonayso in ay dhaliso goolal.
Wolves ayaa si fiican u difaacanaysay goolkeeda iyada oo mararka qaar qaadaysay weeraro rogaal celis ah.
Daqiiqadii 43-aad ayaa Arsenal kaadhka cas ee tooska ah looga saaray xiddiga Myles Lewis-Skelly kaas oo kooxdiisa kaga baxay ciyaarta.
Waxa sidaas ku dhamaatay qaybta hore ee ciyaarta oo ay Arsenal ku dhamaystay 10 ciyaartoy Iyo gool la’aan.
Qaybtii dambe ayay Wolves ahayd kooxda fiican iyaga oo ka faa’iidaysanayay ciyaartoyga ay dheeryihiin Arsenal.
Laakiin daqiiqadii 70-aad ayaa Wolves kaadhka cas looga taagay iyada oo laga saaray ciyaartoyga Joao Gomes.
Arsenal ayaa 4 daqiiqo kadib dhalisay goolka 1-aad waxana u dhaliyay xiddiga Ricardo Calafiori kaas oo kooxdiisa u dhiibay hogaanka ciyaarta.