Dhuusamareeb (Idaacadda Daar-Dheer)-Chelsea ayaa garoonkeeda Stamford bridge guul ay u qalantay kaga gaartay kooxda Bournemouth, kaddib markii ay kaga adkaatay 2-0, ciyaar qeyb ka ahayd kulammada Isbuuca 17-aad ee horyaalka Premier League.
Qeybta hore ee ciyaarta ayaa lagu kala nastay 2-0 ay ku hoggaamineysay kooxda martida loo ahaa ee Chelsea.
Daqiiqadii 16-aad Chelsea ayaa hoggaanka u qabatay ciyaarta kaddib markii uu 1-0 ka dhigay Kai Havertz, waxaana ka caawiyay saaxiibkiis Raheem Sterling.
24 daqiiqo marka ay dheesha mareysay Mason Mount oo caawin ka helay saaxiibkiis Kai Havertz, ayaa wuxuu ciyaarta ka dhigay 2-0 ay ku hoggaamineysay kooxda Chelsea.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
Balse ugu dambeyntii ciyaarta ayaa ku dhammaatay 2-0 ay kaga adkaatay Chelsea, kooxda Bournemouth oo marti ugu ahayd garoonka Stamford bridge, Blues ayaa miiska kala sarreynta horyaalka kaga jirta booska 8-aad, waxayna leedahay 24 dhibcood.