Dhuusamareeb (Idaacadda Daar-Dheer)–Kooxda kubadda cagta Chelsea ayaa samaysay saxeexii labaad ee ay hadiyad uga dhigayso tababare Mauricio Pochettino oo horraantii bishan loo magacaabay macallinka cusub ee Blues hoggaamin doona sannadaha soo socda.
Chelsea ayaa dhamaystirtay heshiiska weeraryahan ay ku xoojinayso safkeeda iyadoo horraantii toddobaadkanna ay kooxdu si rasmi ah ugu dhawaaqday heshiiska xiddiga reer France ee Christopher Nkunku oo ay kala soo wareegeen RB Leipzig oo sannad ka hor ay qandaraaskiisa sii dhamaystireen.
Blues oo dersin ciyaartooyo ah ay ka tegayaan xagaagan, ayaa waxay dhinaca kale la saxeexanaysaa ciyaartooyo uu soo doortay tababaraha cusub ee Pochettino, waxaana ay heshiis la gaadheen weeraryahanka reer Senegal ee Nicolas Jackson oo ay £30 milyan oo Gini kaga soo iibsadeen Villarreal.
22 jirkan ayay Chelsea u ballamisay dhakhaatiirta si ay ugu sameeyaan tijaabada caafimaadka ka hor inta aan heshiiskiisa si rasmi ah loogu dhawaaqin, waxaana uu markaas kaddib saxeexi doonaa heshiis waqti dheer ah.
Heshiiska Nicolas Jackson ayay Chelsea ku garaacday saddex kooxood oo kale oo waaweyn oo reer Yurub ah oo doonayay inay la saxeexdaan, waxaase dalabkii ugu macquulsanaa la shir-tagtay Chelsea oo qancisay ciyaartoyga iyo kooxdiisa Villarreal intaba.
Jackson ayaa xilli ciyaareedkii tegay waxa uu Villarreal u saftay 38 ciyaarood oo uu u dhaliyey 13 gool iyo shan kale oo uu caawiye ka noqday, hase yeeshee siddeeddii ciyaarood ee ugu dambeeyey horyaalka ayaa uu dhaliyey sagaal ka mid ah goolashaas.