Dhuusamareeb (Idaacadda Daar-Dheer)-Arsenal oo tiro ciyaartooyo ah indhaha ku haysa, si ay isku xoojiso oo ay ugu guuleysan karto horyaalka Premeir League ee ay shanta dhibcood ku hoggaaminayso ayaa Jorginho uu diiraddooda soo galay xilli ay 24 saacadood ka hadhsan yihiin waqtiga uu suuqu xidhmayo.
Wariyaha ciyaaraha ee Fabrizio Romano ayaa waxa uu sheegay, in Gunners ay hadda wada-hadallo laba-geesood ah kula jirto Jorginho iyo Caicedo oo haddii uu laacibka reer Ecuador iman waayo Emirates Stadium ay saacadaha soo socda dedaalkooda Jorginho kordhin doonaan.
Suuqa iibka ciyaartoyda oo xidhmaya saqda dhexe ee habeen dambe oo ku beegan 11pm saacadda UK, ayaa waxa inta ka horreysa ay Arsenal xaqiijisan doontaa Jorginho ama Moises Caicedo, iyadoo dalabkii saddexaad ee ay Gunners ka gudbisay Caicedo ay si aad ah sare ugu qaadday lacagta ay ku doonayso.
Sida ay wararkii ugu dambeeyey ee laga soo dusinayo Arsenal ay sheegayaan, waxay dalabka saddexaad ay Arsenal ka dhigtay £70 milyan oo Gini oo naqad ah iyo £5 milyan oo Gini oo dheeraad ah oo ku xidhnaanaya bandhiggiisa oo dib laga bixin doono, laakiin Brighton ayaa dalbanaysa £80 milyan oo Gini.
Jorginho ayaa isagana waxay Gunners ku doonaysaa lacag aad u hoosaysa oo la rumaysan yahay in ay Chelsea aqbali doono sababtoo ah lix bilood kaddib ayuu xiddigani xor ka noqon doonaa Stamford Bridge haddii ay Blues iska diiddo inay aqbasho dalabka Arsenal.