Dhuusamareeb (Idaacadda Daar-Dheer)-Tababaraha Barcelona, Hansi Flick, ayaa ka hadlay diyaar-garowga kooxdiisa kahor kulanka muhiimka ah ee El Clasico ee ay la ciyaarayaan Real Madrid. Flick wuxuu sheegay in inkastoo guuldarradii ka soo gaartay Milan ay niyad-jab ahayd, haddana kooxda si wanaagsan ayey u shaqeysay afartii bilood ee lasoo dhaafay, ayna diyaarsan yihiin.
Wuxuu xusay in Barcelona ay heysato afar kulan oo ay isku muujin karaan, El Clasico-na uu yahay fursad weyn si ay u muujiyaan kalsoonidooda. Wuxuu hoosta ka xariiqay muhiimada ah in ciyaartoydu noqdaan 100% firfircoon, ad-adag, una ciyaaraan si heersare ah marka ay wajahayaan Madrid.
Flick wuxuu qiray in Real Madrid tahay koox weyn, balse Barcelona ay ciyaarta gurigeeda ku ciyaarayso, taageerayaashuna ay door weyn ka qaadan doonaan. Wuxuu sheegay in kooxdiisu aysan ka walwalsanayn xaaladda kala sarreynta horyaalka, balse ay muhiim tahay inay guuleystaan.
Wuxuu sidoo kale ka hadlay qaab ciyaareedka Real Madrid, isagoo sheegay inay yihiin koox aad ugu fiican weerarka rogaal celiska iyo difaaca tooska ah. Ugu dambeyntii, Flick wuxuu rajeynayaa in kooxdiisu ay ka faa’iidaysato garoonkooda isla markaana ay saddexda dhibcood qaataan.