Dhuusamareeb (Idaacadda Daar-Dheer)-Kooxda chelsea ayaa marti galinaysa kooxda Borussia Dortmund kulan ka dhacaya Stamford Bridge kana tirsan lugta 2-aad ee wareega 16-ka ee koobka champions League.
Chelsea ayaa kulanka soo galaysa iyaga oo isha ku haya in ay gaadhaan guul ka caawisa in ay ku soo laabato kulanka kadib markii ay lugtii hore guuldaro 1/0 ah kala kulantay Dortmund.
Dhinaca kale Dortmund ayaa doonaysa in ay xaalka ku xumayso kooxda chelsea iskana xaadiriso wareega xiga ee tartanka champions League.
Kulanka: Chelsea Vs Borussia Dortmund
Tartanka: Champions League
Wakhtiga: 11:00
Garoonka: Stamford Bridge
XAQIIQOOYINKA KULANKA:
Chelsea ayaa markii uu horaysay marti galinaysa kooxda Borussia Dortmund tartanka champions League xilli ay 7 kulan la ciyaareen kooxaha reer Germany iyada oo Blues aan wax guul ah gaadhin labadii kulan ee ugu dambeeyay.
Borussia Dortmund ayaa laga badiyay 5-tii kulan ee ugu dambeeyay ee ay champions League marti u noqotay kooxaha Premier League tan ilaa markii ay 2/1 kaga badiyeen Arsenal bishii October 2013.
Kooxda Borussia Dortmund ayaa wareega xiga u gudubtay 5 ka mid ah 6-dii kulan ee ugu dambeeyay ee ay champions League guul gaadheen lugta hore wareega bug baxa.
Chelsea ayaa badisay 7 ka mid ah 9-kii kulan ee ugu dambeeyay ee ay garoonkeeda ku ciyaartay marka laga reebo Guuldaradii 3/1 ahayd ee ay kala kulantay Real madrid xilli ciyaareedkii hore iyo bar-barihii 1/1 ahaa ee ay la gashay RB Salzburg kulan ka tirsanaa wareega Group-yada xilli ciyaareedkan.