Dhuusamareeb(Radio Daar-Dheer)- Kooxaha Manchester City iyo Everton ayaa dhibcaha ku qeybsaday garoonka Etihad, kaddib markii ay ku kala baxeen barbardhac 1-1 ah, ciyaar ka tirsaneyd horyaalka Premier League.
Qeybta hore ee ciyaarta ayaa lagu kala nastay 1-0 ay ku hoggaamineysay kooxda martida loo ahaa ee Manchester City.
Daqiiqadii 24-aad kooxda Manchester City ayaa hoggaanka u qabatay dheesha kaddib markii uu 1-0 ka dhigay weeraryahankooda Haaland, waxaana goolkan ka caawiyay saaxiibkiis Mahrez.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
Laakiin 64 daqiiqo marka ay dheesha mareysay naadiga Everton ayaa dhalisay goolka barbardhaca waxaana 1-1 ka dhigay Demarai Gray oo caawin ka helay Idrissa Gueye.
Ugu dambeyntii ciyaarta ayaa ku dhammaatay barbardhac 1-1 ah ay ku kalabaxeen labada kooxood Manchester City iyo Everton, Sky Blues oo kaalinta labaad kaga jirta miiska kala sarreynta horyaalka ayaa waxay leedahay 36 dhibcood.