Dhuusamareeb (Idaacadda Daar-Dheer)-Lugta hore ee kulamada wareega sideed dhamaadka Champions League ayaa ahaa kuwa aad u xiiso badan.
Si gaar ah kulankii ay Barcelona u safartay Paris Saint-Germain iyadoo kooxda shanta jeer ku guuleysatay Champions League ay guul soo laabasho 3-2 ah gaartay ka hor kulanka lugta labaad ee Talaadada.
Xiddigii hore ee Leeds United Raphinha ayaa wacdarro dhigay halka Kylian Mbappe la aamusiyay.
Da’ yarta Barcelona ayaa rikoodh cusub loo diiwaangeliyay iyagoo dhabar adeyg ku hor muujiyay jamaahiirta PSG oo sawaxan kala duldhacay.Laacibka reer Brazil Raphinha waligiis gool kama dhalinin Champions League ka hor kulankii xalay ee Paris, laakiin labadiisa gool waxay ahaayeen kuwa cajiib ah.
27 jirkaan ayaa halis ahaa ciyaarta oo dhan isago helay darbooyinka ugu badan (lix), darbooyinka goolka ku bartilmaameedsan (afar) iyo kubadaha ugu badan ee lagu taabtay xerada ganaaxa PSG (lix) ee kooxda Barcelona.
Kooxda Barcelona ayaa heysatay ciyaartooy qibrad leh sida 35 jirka weerarka ka ciyaara Robert Lewandowski iyo 33 jirka khadka dhexe Ilkay Gundogan, laakiin kooxdooda waxaa ka buuxay ciyaartooy da’ yar.
Waxay galeen taariikhda iyadoo xiddiga reer Spain Lamine Yamal (16 sanno iyo 272 maalmood) iyo daafaca Pau Cubarsi (17 sanno iyo 79 maalmood) ay noqdeen xiddigihii ugu da’da yaraa abid ee ciyaara wareega sideed dhamaadka Champions League.
Daafacyada Jules Kounde iyo Ronald Araujo labaduba waa 25 sanno jir, halka 21 jirka Pedri uu wehliyay 20 jirka Fermin Lopez oo kursiga keydka ka soo kacay.
Daafacyada Barcelona ayaa ku guuleystay inay jeebka ku ritaan laacibka PSG Kylian Mbappe oo aan waligiis ku guuleysanin Champions League.
Mbappe ayaa la xadiday ciyaartiisa isago helay kaliya seddex darbo oo midkoodna uusan aheyn mid ku bartilmaameedsanaa goolka, waxaana uu noqday xiddigaha ugu kubad taabasho yar ee ciyaartoyda PSG isagoo kubada taabtay ciyaarta oo dhan 44 jeer.