Dhuusamareeb (Idaacadda Daar-Dheer)- Kooxda Liverpool ayaa guul soo laabasho leh ka gaadhay kooxda West Ham kulan Reds looga naxsaday goolka furitaanka ciyaarta.
Kulanka ayaa ahaa Liverpool maamulaysay ciyaarta xilli ay West Ham qaadaysay weeraro rogaal celis ah oo ay doonaysay in ay ku dhaawacdo Liverpool.
Liverpool ayaa dhinaceeda samaynaysay fursado aan kala joogsi lahayn iyaga oo raadinayay in ay ciyaarta goolasha u furaan.
Daqiiqadii 12-aad ayay West Ham dhalisay goolka 1-aad waxana u dhaliyay xiddiga Lucas Paqueta kaas oo ciyaarta ka dhigay 1/0 ay West Ham ku hogaaminayso.
Liverpool ayaa biloday raadinta goolka bar-baraha xilli West Hamd aafac gashay si ay goolka u ilaashato isla markaas weeraro rogaal celis ah ku qaado.
Daqiiqadii 18-aad ayay Liverpool ku soo laabatay ciyaarta iyaga oo uu goolka u dhaliyay xiddiga Cody Gakpo kaas oo ciyaarta ku soo celiyay bar-baro.
West Ham ayaa dhalisay gool kale waxana u dhaliyay xiddiga Bowen laakiin goolkaas ayaa laga diiday sabab la xidhiidha Offside uu ku jiray.
Waxa sidaas ku dhamaatay qaybtii hore ee ciyaarta oo ay Liverpool ahayd kooxda fiican laakiin West Ham heshay fursado ay ku dhalin kartay goolal.
Qaybta dambe ayay Liverpool ahayd kooxda fiican iyaga oo ka awood badnaa kooxda West Ham kuwaas oo aan si fiican u ciyaarin.
Daqiiqadii 67-aad ayay Liverpool dhalisay goolka 2-aad waxana u dhaliyay xiddiga Joel Matip kaas oo ciyaarta hogaankeeda u dhiibay kooxdiisa ciyaartana ka dhigay 2/1.
Dhinaca kale kooxda Chelsea ayaa sii wada luminta dhibcaha premier League waxana ay guuldaro 2/0 ah kala kulmeen kooxda Brentford kulan Lampard dusha loo saaray guuldaradii 5-aad tan ilaa markii uu ku soo laabtay kooxda.