Dhuusamareeb (Radio Daar-Dheer)-Liverpool ayaa bartilmaameedkeeda ugu sareysa ka dhigtay Leroy Sane si ay ugu buuxiso booska Mohamed Salah sida ay sheegayaan wararku.
Salah ayaa xiiso ka helay horyaalka sucuudiga suuqii xagaaga laakiin Reds ayaa diiday dhamaan dalabyadii u yimid xiddiga reer Masar.
Waxa la rumaysanyahay in ay Liverpool diiday dalab 150 milyan ah oo ay kooxda Al-Ittihad ku doonaysay saxiixa xiddiga reer Masar.
Sida laga xigtay Mirror, Liverpool ayaa filaysa in ay lumiso Mohamed Salah dhamaadka xilli ciyaareedkan iyada oo xiisaha sucuudigu sii xoogaysanayo.
Sidaas darteed Liverpool ayaa haatana diyaarinaysa badalka suurtagalka ah ee Xiddiga 31 jirka ah.
Wararka ayaa sheegaya in Liverpool ay xitaa diyaar u tahay in ay jabiso rikoodhkeeda suuqa kala iibsiga oo ah 85 milyan oo ay kula soo saxiixatay Darwin Nunez si ay ula soo saxiixato Sane xagaaga dambe.