Dhuusamareeb (Idaacadda Daar-Dheer)-Xulka qaranka Uruguay ayaa guuldaro 2/1 ah kala kulmay xulka Ecuador kulan ka tirsanaa is reeb-reebka koobka adduunka.
Kulanka waxa dhaawac uga baxay xiddiga Darwin Nunez, weeraryahanka Liverpool intii lagu jiray Nasiinada ciyaarta.
Nunez ayaa ka qeyb galay guushii weyneyd ee Uruguay ay ka gaareen Chile kulankii hore ee is reeb-reebka koobka adduunka.
Inkastoo uu si maldahan u sheegay tababaraha xulka Uruguay Marcelo Bielsa in Nunez laga yaabo inuu bedel ku soo galo kulankii Ecuador, ciyaaryahanka ayaa ku bilowday shaxda.
Nasiib darro, Nunez ayaa la siiyay kaliya 45 daqiiqo ka hor inta aan lagu bedelin Cristian Oliveira kadib markii uu sii wadan kari waayay ciyaarta.
Bielsa oo ciyaarta kadib la hadlay warfidiyeenada ayaa tilmaamay in Nunez looga saaray dhaawac muruqa ah, si kastaba ha ahaatee, ma jirto wax calaamad ah oo muujinaya dhaawac dhab ah oo soo gaaray weeraryahanka, maadaama ka bixitaankiisa ciyaarta uu noqon karay daal.
Bielsa ayaa sharaxay in Nunez uu awoodi waayay in uu ka soo baxo waajibaadkiisa weerarka sababo la xiriira dadaalkii uu saddex maalmood ka hor ka sameeyay Chile.