Dhuusamareeb(Idaacadda Daar-Dheer)Manchester United ayaa war cusub ka
heshay baacsiga ay ugu jirto weeraryahanka Ajax Antony.
22-sano jirkaan ayaa xilli ciyaareedkii hore qaab ciyaareed wanaagsan ku soo
bandhigay kooxda heysata horyaalka Eredivisie, isagoo dhaliyay 12 gool, waxaana
uu caawiyay 10 kale 32 kulan oo uu saftay tartamada oo dhan.
Erik ten Hag ayaa xiddiga reer Brazil keenay kooxda Ajax sanadkii 2020 isaga oo
kala soo saxiixday kooxda Sao Paulo tababaraha cusub ee Man United ayaa
doonaya in uu xiddiga kula midoobo Old Trafford.
Man United ayaa u muuqata in ay war fiican ka heshay baacsiga ay ugu jirto
saxiixa xiddiga iyada oo Ajax bilowday in ay raadiso badalkiisa iyada oo lala
xidhiidhinayo xiddigo garabka ka ciyaara.
Kooxda Ajax ayaa lagu soo waramayaa in ay diyaar u tahay in ay iska iibiso xiddiga
laakiin waxa ay dalbanaysaa lacag dhan 80 milyan oo euro taas oo ah mid ay
United diidantahay.
Xiddiga Antony ayaa dhankiisa kooxda Ajax ku riixaya in ay u ogolaadaan in uu ku
biiro kooxda man United si uu ula midoobo tababarihiisii hore.