Dhuusamareeb (Idaacadda Daar-Dheer)-Chelsea ayaa si rasmi ah ugu dhawaaqday saxiixa Enzo Fernandez oo ay kala soo wareegeen kooxda Benfica ee dalka Portugal.
Chelsea ayaa qandaraas sideed sannadood iyo bar ah ka saxiixday Enzo Fernandez iyadoo qandaraaskiisa uu dhacayo bisha Juun 2031ka.
Chelsea waxay xiddigaan ku iibsatay lacag gaareysa 120 milyan euro oo rikoodh u noqoneysa suuqa kala iibsiga Premier League, laakiin lacagta waxay kala bixin doonaan lix jeer.
Waxay haatan afka hore ka bixiyeen 40 milyan euro, halka inta soo hartay ay yar yareyn doonaan. Kooxdiisa hore ee River Plate ayaa sidoo kale qaadaneysa boqolkiiba 25 lacagta lagu iibsaday Enzo Fernandez sida hishiiska ku xusan.
Enzo Fernandez ayaa noqday xiddigii ugu qaalisanaa abid horyaalka Premier League, wuxuuna rikoodhkaan dhigayaa isagoo ka mid ah xiddigaha ugu xiisaha badan dunida haatan islamarkaana xulka Argentina la soo qaaday Koobka Adduunka.
Chelsea ayaa sideed saxiix sameysay suuqii kala iibsiga bisha Janaayo waana kooxdii ugu mashquulka badneyd ee qarashgareysay lacagta ugu badan dhamaan horyaalada kubada cagta Yurub.