Dhuusamareeb (Idaacadda Daar-Dheer)-Manchester United ayaa xaqiijisay saxiixa xiddiga khadka dhexe Marcel Sabitzer oo ay kala soo wareegeen Bayern Munich.
Sabitzer oo 28 sanno jir ah ayaa amaah ugu biiray Manchester United ilaa iyo dhamaadka xilli ciyaareedkan.
Hishiiska kuma jiro qodob ogaalanaya ama waajib ka dhigaya in xiddiga reer Australia uu si joogto ah ugu biiro Man United ka dib hishiiska amaahda.
United kuma dhawaaqin hishiiska ka hor inta uusan xirmin suuqa kala iibsiga laakiin waxay warqada hishiiska gudbiyeen daqiiqado iyadoo ay ka harsaneyd suuqa, taasoo keentay in la siiyo saacad dheeri ah oo ay ku dhameystiraan.
Sabitzer oo ka hadlayay ku biiritaankiisa Manchester United ayaa yiri: “Mararka qaar waxaa noloshaada ku soo mareysa inaad gaarto go’aano deg deg ah oo muhiim ah.
“Waqtigii aan maqlay fursadaan waan ogaa inay aheyd mid igu haboon. Waxaan ahay ciyaaryahan tartama, waxaan doonayaa inaan guuleysto oo aan kooxda ka caawiyo inay gaarto hamigeeda xilli ciyaareedka.
“Waxaan dareemayaa inaan ku jiro meeshii ugu fiicneyd waayaheyfa ciyaareed, waxaan kooxda ku soo kordhin karaa khibrad badan iyo tamar badan.
“Ma sugi karo inaan la shaqeeyo asxaabteyda cusub iyo tababaraha oo aan tayadeyda tuso taageerayaasha Manchester United.”
Kooxda Shayaadiinta Cas Cas ayaa suuqa kala iibsiga gashay maalintii Deadline Day ka dib markii la shaaciyay in Christian Eriksen uu seddex bilood garoomada ka maqnaanayo ka dib dhaawac canqowga ah oo soo gaaray.