Dhuusamareeb (Idaacadda Daar-Dheer)-Kooxda kubadda cagta Real Madrid ayaa iska lumisay fursad ay kula wareegi lahayd hoggaanka horyaalka Spain ee La Liga waxaanay guul-darro xanuun kulul kala soo kulmeen Villarreal kulan laba rikoodhe oo aad looga dooday ay daqiiqado gudahood iskugu jawaabeen.
Villarreal oo garoonkeeda Estadio de la Ceramica dhax jiid-jiidday Real Madrid oo ay ugu awood sheegatay 2-1, iyadoo dhinac walba oo garoonka ah kaga fiicnayd. Fursado badan oo goolal noqon lahaa ayay Villarreal iska lumisay labadii qaybood ee ciyaarta, iyadoo Real Madrid ay dhinceeda khasaarisay kubbado goolal loo qaatay.
Laba gool oo midkood rikoodhe ahaa oo ay kala dhaliyeen Yeremy Pino iyo Gerard Moreno ayaa kooxda martida loo ahaa siiyey saddex dhibcood oo muhiim ahaa oo ay kusoo cidhiidhsadeen kaalinta shanaad ee miiska kala-sarraynta.
Daqiiqaddii 47aad ee bilowga qaybta dambe ayuu Yeremy Pino hoggaanka ugu dhiibay Villarreal kubbad uu ka faa’iidaystay kala-daadsanaanta difaaca Real Madrid, hase yeeshee Karim Benzema ayaa rikoodhe uu mugdi ku jiray kusoo nooleeyey kooxdiisa ka hor intii aanu Gerard Moreno ugu jawaabin rikoodhe kale.
.Ciyaarta ayaa kusoo dhamaatay 2-1 ay guushu ku raacday Villarreal, waxaanay natiijadani ka dhigan tahay in Real Madrid ay ku jirto kaalinta labaad oo ay isku dhibco yihiin Barcelona oo Maanta la ciyaaraysa Atletico Madrid, waxaanay labadooduba haystaan min 38 dhibcood.