Dhuusamareeb (Idaacadda Daar-Dheer)-Kooxda Real Madrid ayaa calaamadsatay laba ciyaaryahan oo khadka dhexe ah oo ay doonayso inay la soo wareegto, si ay ugu beddesho Luka Modric oo ka tagaya Santiago Bernabéu xagaagan.
Los Blancos ayaa hore u xaqiijisay in Modric uu ka tagi doono kooxda dhamaadka xilli ciyaareedkan. Laacibka khadka dhexe ee Croatia ayaa ciyaari doona kulankiisii ugu dambeeyay ee La Liga Sabtida, markaasoo ay Real Madrid garoonkooda ku martigelin doonto Real Sociedad.
Modric ayaa si rasmi ah uga tagi doona kooxda kadib marka ay dhameystaan tartanka FIFA Club World Cup xagaagan.
Sida laga soo xigtay warbaahinta Cadena SER, Real Madrid ayaa calaamadsatay laba ciyaaryahan oo ay u aragto inay bedeli karaan Modric, oo ah xiddig ku guuleystay abaalmarinta Ballon d’Or sanadkii 2018.
Labada ciyaaryahan ee la xusay waa Enzo Fernández oo ka tirsan kooxda Chelsea, iyo Exequiel Palacios oo u ciyaara kooxda horyaalka Bundesliga ee Bayer Leverkusen.
Luka Modric ayaa ku biiray Real Madrid sanadkii 2012 isagoo kaga yimid kooxda Tottenham Hotspur ee Premier League. Intii uu joogay kooxda, Modric wuxuu ku guuleystay 28 koob oo ay ka mid yihiin lix UEFA Champions League iyo afar horyaal oo La Liga ah.