Dhuusamareeb (Idaacadda Daar-Dheer)-Chelsea ayaa barbaro niyadjab leh kala kulantay kooxda Fulham oo marti ku aheyd Stamford Bridge iyagoo ku kala baxay barbaro goolal la’aan ah.Chelsea oo isku xoojisay in ka badan 200 milyan ginni bishii Janaayo ayaa mar kale muujisay inay ka liidato dhanka dhameystirka weerarka iyagoo aan fursadihii ay heleen ka faa’ideysan waayay qeybtii labaad ee ciyaarta.Natiijadaan waxay cadaadiska ku sii kordhineysaa tababare Graham Potter oo aan marmarsiiyo u heli doonin hoos u dhaca Chelsea oo haatan 20 dhibcood ka hooseysa Arsenal.
Chelsea ayaa qeybtii hore u dhawaatay inay hogaanka u qabato ciyaarta laakiin waxaa Fulham badbaadisay birta goolka, iyadoo Chelsea ay ku guuldareystay inay ciyaar weerar isku xiran kala hortagto kooxda deriskeeda ah qeybtii hore ee ciyaarta.
Laakiin qaab ciyaareedka saxiixooda cusub Enzo Fernandez ayaa ahaa waxa uga wanaagsan ee laga diiwaangeliyay ciyaarta qeybteedii hore, waxay u aheyd ku bilaabasho aad u fiican isagoo soo bandhigay qaab ciyaareed fiican inkastoo Fulham ay khadka dhexe ku xooganeyd.