Dhuusamareeb (Idaacadda Daar-Dheer)–Daafaca Liverpool, Virgil van Dijk, ayaa sheegay in aysan jirin wax horumar ah oo ku saabsan heshiiskiisa cusub, isla markaana aan wali la bilaabin wadahadallo rasmi ah oo lagu kordhinayo qandaraaskiisa. Van Dijk, oo haatan galay lixdii bilood ee ugu dambeeyay ee heshiiskiisa, wali ma saxiixin heshiis cusub oo uu kula sii joogayo kooxda.
Qandaraaska Van Dijk ee Liverpool waxa uu ku eg yahay dhammaadka xilli ciyaareedkan, taas oo la micno ah in haddii wax isbeddel ah la sameyn waayo, uu xor u noqon doono in uu kooxda ka tago. Daafaca 33 jirka ah ayaa muddo badan lala xiriirinayay arrimo la xiriira mustaqbalkiisa, balse wuxuu xusay in aanay jirin war cusub oo arrintaas ku saabsan.
“Ma jiro wax cusub, waana arki doonnaa waxa mustaqbalku keeno,” ayuu Van Dijk yiri.
Van Dijk ayaa ah xubin muhiim ah oo ka tirsan kooxda Liverpool, wuxuuna diiradda saarayaa in uu kooxda ka caawiyo hanashada horyaalka Premier League xilli ciyaareedkan.