Dhuusamareeb (Idaacadda Daar-Dheer)-Kooxda kubadda cagta Liverpool ayaa guul-darro kale oo xanuun badan soo hoysay, waxaanay u dhaadhacday kaalinta 10aad ee horyaalka Premier League kaddib markii ay Wolves kusoo karbaashtay Molineux Stadium.
Laba gool oo tobankii daqiiqadood ee ugu horreeyey ciyaarta ay ku dhalisay Wolves iyo mid saddexaad oo uu Nunes ku siririyey qaybtii labaad ayaa musiibo ku noqday Reds oo aan hal marna guuleysanin sannadkan cusub ee 2023 ee bishiisii labaad bilaabantay horyaalka Premier League.
Daqiiqaddii shanaad ee bilowga ciyaarta ayay Wolves heshay goolkeeda koowaad oo ay u qalmaysay sabbatoo ah weerar aan joogsi lahayn oo ay ku hayasay goolka uu waardiyaha ka ahaa Alisson.
Kubbad uu khadka dhexe ka sameeyey Nunes ayaa uu u tuuray Hee-Chang oo dhinaca midig kala soo galay xerada ganaaxa, waxaana uu soo hordhigay goolka balse Joel Matip ayaa isku qabtay oo shabaqa kooxdiisa ku leexiyey.
Daqiiqaddii tobnaad ayay Wolves la timid goolka labaad oo uu darbad awood badan oo xerada ganaaxa dhaxdeeda uu ka toogtay uu shabaqa ku hubsaday Dawson. Kubbad uu Cunha dhinaca midig kasoo jabiyey ayaa waxa madax iskaga saaray Gomez oo goolka hortiisa u dhigay Dawson oo isaguna mar kale ku celiyey, sidaasna shabaqa ugu hubsaday.
Xiddiga reer Portugal ee Nunes ayaa kubbad uu kala dhax-baxay difaacyahannada kala daadsan waxa uu ula tegay Alisson oo uu dhinac ka dhigay, sidaas ayaanu ciyaarta kaga dhigay 3-0.
Mohamed Salah iyo Darwin Nunez ayaa lumiyey laba fursadood oo fiican. Weeraryahanka Uruguay ee Nunez ayaa kubbad loo tuuray ula tegay goolhaye Sa oo halkii uu dhinaca ka dhigi lahaa uu darbad xooggan oo dhulka ah ku toogtay, waana laga qabtay.
Ciyaarta ayaa kusoo dhamaatay 3-0 ay guushu ku raacday Wolves oo u qalmaysay inay la timaaddo goolal intaas ka badan.