Dhuusamareeb (Radio Daar-Dheer)- Kulan xiiso leh ayaa dhexmaray kooxaha Barcelona Athletic Bilbao kulan ka dhacay garoonka Camp Nou kana tirsanaa horyaalka La Liga.
Kulanka ayaa ahaa mid ay labada kooxood isku jawaabayaan koox walbana doonayso in ay ku hor maraan goolka furitaanka ciyaarta.
Barcelona ayaa maamulaysay ciyaarta xilli ay Bilbao ciyaaraysay weeraro rogaal celis ah oo halis galiyay kooxda Barcelona.
Kooxda Tababare Xavi ayaa wax walba u samaysay sidii ay u dhalin lahayd gool laakiin waxa ka maqnayd dhamaystirka fursadaha.
Dhinaca kale Bilbao ayaa marar badan ku dhawaatay in ay dhaliyaan gool ay ciyaarta hogaanka ugu qabtaan laakiin waxa ay iska lumiyeen fursado badan.
Waxa bar-baro ku dhamaatay qaybta hore ee ciyaarta oo ay labada kooxood ku fashilmeen in ay wax goolal ah kala dhaliyaan.
Qaybta dambe ayay Barcelona sii waday dadaalada iyo cadaadiska ay ku hayso kooxda Bilbao kuwaas oo daafac ku jira si ay u joojiyaan weerarka Barcelona.
Daqiiqadii 80-aad ayay Barcelona dhalisay goolka 1-aad waxana u dhaliyay xiddiga Marc Guiu oo 17 sano jira kaas oo kooxdiisa hogaanka u dhiibay.
Xiddiga Marc Guiu ayaa dhaliyay goolka kadib markii uu badal ku soo galay isaga oo goolka ka dhaliyay fursadii ugu horaysay ee uu helay isla markaas kubada taabtay.
Wxa sidaas ku dhamaatay ciyaarta oo ay Barcelona gaadhay guul ay uga mahad celinayaan xiddiga da’yarka ah ee Marc Guiu.